मध्य रेल्वेची वाहतूक पुन्हा एकदा विस्कळीत झाली आहे. भायखळा येथे सिग्नल यंत्रणेत बिघाड झाल्याने मध्य रेल्वेच्या मुंबईकडे येणाऱ्या जलद मार्गावरील वाहतुकीवर मोठा परिणाम झाला आहे. या बिघाडामुळे अनेक एक्स्प्रेस गाड्या आणि लोकल सेवा उशिराने धावत आहेत. ज्यामुळे ऐन गर्दीच्या वेळी प्रवाशांना मोठ्या त्रासाला सामोरे जावे लागत आहे. कामाला निघालेल्या प्रवाशांना लोकल उशिराने धावत असल्यामुळे फटका बसला आहे.

लोकलसेवा विस्कळीत झाल्यामुळे सर्वच रेल्वे स्थानकांवर प्रवाशांची मोठी गर्दी झाली आहे. लोकल उशिराने धावत असल्यामुळे आजही कर्मचाऱ्यांना लेटमार्क लागण्याची शक्यता आहे. दरम्यान, रेल्वे प्रशासनाकडून दुरुस्तीचे काम सुरू असले तरी वाहतूक पूर्ववत होण्यास काही वेळ लागण्याची शक्यता आहे. यामुळे मध्य रेल्वेच्या संपूर्ण वेळापत्रकावर परिणाम झाला असून विविध स्थानकांवर प्रवाशांची मोठी गर्दी झाली आहे. गर्दी असल्यामुळे अनेकांना लोकलमध्ये चढता येत नाही तर काही जण लोकलच्या दाराजवळ उभं राहून प्रवास करत आहेत.