मुंबईत आज सकाळपासून जोरदार पावसाला सुरुवात झाली आहे. या पावसामुळे शहरातील अनेक ठिकाणी पाणी साचले असून अंधेरी सबवे पूर्णपणे पाण्याखाली गेला आहे. त्यामुळे या मार्गावरील वाहनचालकांची मोठ्या प्रमाणात गैरसोय होत आहे. पाणी साचल्यामुळे वाहतूक बंद करण्यात आली आहे. पावसाचा फटका केवळ अंधेरीपुरता मर्यादित नसून दादर, सायन, कुर्ला, आदी भागांमध्येही रस्त्यांवर पाणी साचल्याचे चित्र दिसत आहे. मुसळधार पावसामुळे रस्त्यावरील वाहतूक संथ गतीने सुरू आहे. हवामान खात्याने मुंबईत दिवसभर जोरदार पावसाचा इशारा दिला आहे. नागरिकांना आवश्यक असल्याशिवाय बाहेर न पडण्याचे आवाहन प्रशासनाने केले आहे.