मनसेची चिंतन बैठक अखेर संपली आहे. विधानसभा निवडणुकीत पराभूत झालेल्या उमेदवारांची बैठक आज मनसे अध्यक्ष राज ठाकरे यांनी शिवतीर्थावर घेतली. सकाळपासून सुरू असलेली ही बैठक आता संपली आहे. या बैठकीत राज ठाकरे यांनी उमेदवारांची मतं जाणून घेतली आहे.

राज्यात विधानसभा निवडणूक नुकतीच पार पडली आहे. यात महाराष्ट्र नवनिर्माण सेनेचा दारुण पराभव झाला आहे. राज्यात मनसेचा एकही आमदार निवडून न आल्याने या पराभवावर चिंतन करण्यासाठी आज राज ठाकरे यांनी शिवतीर्थावर ही बैठक बोलावली होती. या बैठकीत ईव्हीएमबाबत उमेदवारांनी शंका उपस्थित केली आहे. त्याचबरोबर लोकसभेत भाजपशी केलेली जवळीक पक्षासाठी घातक ठरली असल्याचा सुर यावेळी बैठकीत उपस्थित उमेदवारांनी लावला. तर काही उमेदवारांना भाजपकडून अंतर्गत पाठिंबा मिळेल अशी अपेक्षा होती. त्यामुळे देखील पराभवाला सामोरं जावं लागल्याचं म्हंटलं गेलं. यानंतर आता मनसेच्या मुख्य नेत्यांची बैठक होणार आहे. त्यानंतर राज ठाकरे काय भूमिका घेतात हे पाहाणं महत्वाचं ठरणार आहे.

Edited By Rakhi Rajput