Shivsena UBT : ठाकरे गटाचे प्रतोद, गटनेते आणि सभागृह नेते ठरले; भास्कर जाधव यांच्यावर मोठी जबाबदारी

शिवसेना उद्धव बाळासाहेब ठाकरे पक्षाच्या नवनिर्वाचित आमदारांची आज उद्धव ठाकरेंसोबत मातोश्रीवर बैठक पार पडली. या बैठकीत पक्षाचा प्रतोद, गटनेते आणि सभागृह नेते निवडण्यात आले. यावेळी उद्धव ठाकरे यांनी भास्कर जाधव यांच्यावर मोठी जबाबदारी दिली आहे. भास्कर जाधव यांची उद्धव बाळासाहेब ठाकरे पक्षाच्या गटनेते पदी निवड करण्यात आली आहे. तर सुनिल प्रभू यांची पुन्हा एकदा प्रतोदपदी नियुक्ती करण्यात आली आहे. विधिमंडळ पक्ष नेतेपदी आदित्य ठाकरे यांची निवड करण्यात आली.

उद्धव ठाकरेंसोबत मातोश्रीवर आज शिवसेना उद्धव बाळासाहेब ठाकरे पक्षाच्या नवनिर्वाचित आमदारांची बैठक पार पडली. या बैठकीत उद्धव ठाकरे यांनी नवनियुक्त 20 आमदारांनी मार्गदर्शन केलं. तसंच विधानसभेत जरी समोर फडणवीस असले, तरी तुम्ही 20 आहात. त्यांना पुरून उरा, असा कानमंत्र उद्धव ठाकरे यांनी आमदारांना दिला. याचवेळी नवनिर्वाचित 20 आमदारांकडून प्रतिज्ञापत्र देखील लिहून घेण्यात आलं आहे. या बैठकीत पक्षाचा प्रतोद, गटनेते आणि सभागृह नेते यांची निवड करण्यात आली. भास्कर जाधव यांची नियुक्ती गटनेते पदी केल्यानंतर यावर भास्कर जाधव यांनी 'पक्षप्रमुखांनी दिलेला आदेश विनम्रपणे स्वीकारावा लागतो. अन्यथा आदित्य ठाकरे यांची विधानसभा गटनेते पदी निवड व्हावी', असं माझं मत होतं, अशी प्रतिक्रिया दिली.

Edited By Rakhi Rajput