मिरा भाईंदरमध्ये महाराष्ट्र नवनिर्माण सेनेकडून आज काढण्यात येणाऱ्या मोर्चाला पोलिसांनी परवानगी नाकारली आहे. आज सकाळी दहा वाजता बालाजी हॉटेलपासून या मोर्चाला सुरुवात होणार होती. मात्र त्यापूर्वीच पोलिसांनी मनसेच्या अविनाश जाधव यांच्यासह अनेक पदाधीकाऱ्यांना ताब्यात घेतले आहे. अनेक कार्यकर्त्यांना देखील नजरकैदेत ठेवले आहे. तरी देखील मीरा भाईंदरमध्ये मोठ्या प्रमाणात मनसैनिक जमा झाले असून पोलिस आणि मनसे कार्यकर्त्यांमध्ये झटापटी झाल्याचे पाहायला मिळत आहे. मनसेचे नेते संदीप देशपांडे यांनी आम्ही मोर्चा काढण्यावर ठाम असल्याचे म्हटले होते. मात्र अतिरिक्त पोलीस आयुक्त दत्ता शिंदे यांनी मिरा भाईंदरमध्ये नागरिकांनी मोर्चासाठी एकत्र येऊ नये अन्यथा त्यांच्यावर कारवाई केली जाईल असा इशारा दिला होता. मात्र या ठिकाणी मोठ्याप्रमाणात मनसे कार्यकर्त आल्याने पोलिसांनी त्यांना ताब्यात घेतले आहे.