मशीदीवरील भोंग्यांना विरोध करणाऱ्या राज ठाकरे यांच्या मनसेची मुस्लिमविरोधी भूमिका आता मवाळ झाली आहे. आगामी विधानसभा निवडणुकीत मुस्लिम व्होटबँक जवळ करण्याचा हा प्रयत्न आहे का? असा सवाल आता उपस्थित होत आहे. महाविकास आघाडीकडे जाणारी व्होटबँक आपल्याकडे खेचून घेण्यासाठी मनसेचे प्रयत्न सुरू आहेत.

मनसे नेते दिलीप धोत्रे यांनी मुस्लिम बांधवांसाठी पंढरपूरहून अजमेर यात्रेचं आयोजन केलं आहे. यात कोणताही जात, धर्म, पंथ हा विषय नाही. अजमेरशरीफवर सगळ्या भाविकांची श्रद्धा आहे. असं दिलीप धोत्रे यांनी म्हंटल आहे. तर यावरून मनसेला सुबुद्धी सुचल्याची खोचक टीका संजय राऊत यांनी केली आहे. दरम्यान, मनसेच्या या मवाळ भूमिकेचा नेमका पक्षाला किती फायदा होईल हे निवडणुकांमध्येच समजणार आहे.