संजय गडदे, मुंबई | साम टीव्ही

मुंबईच्या वाहतूक कोंडीचा प्रश्न दिवसेंदिवस जटील होत आहे. मुंबईच्या पश्चिम द्रुतगती मार्गावर दीड ते दोन तास प्रचंड वाहतूक कोंडी झाली आहे. खरं तर सकाळपासूनच या मार्गावर वाहतूक कोंडी झालेली आहे. पश्चिम द्रुतगती मार्गाच्या दोन्ही मार्गिकांवर गोरेगाव, जोगेश्वरी, अंधेरी, विलेपार्ले, मालाड, कांदिवली या भागात वाहतूक कोंडी झाली आहे.

विलेपार्ले ते मालाड या १५ ते २० मिनिटांच्या अंतरासाठी वाहनचालकांना दीड ते दोन तास लागत आहेत. अत्यंत संथगतीने वाहने पुढे जात आहेत. त्यामुळे वाहनचालकांना मनस्ताप सहन करावा लागत आहे. या वाहतूक कोंडीमुळे वाहनचालकांकडून तीव्र नाराजी व्यक्त केली जात आहे. या पश्चिम द्रुतगती मार्गावरील वाहतूक कोंडी सुरळीत करण्यासाठी वाहतूक पोलिसांकडून युद्धपातळीवर प्रयत्न सुरू आहेत.