छत्रपती संभाजीनगरच्या जटवाडा परिसरातील दैवत वृद्धाश्रमात रात्री अचानक आग लागल्याची घटना घडली. गॅस टंचाईमुळे गेल्या काही दिवसांपासून आश्रमात चुलीवर स्वयंपाक केला जात होता. त्याच चुलीतील ठिणगीमुळे ही आग भडकली आणि काही वेळातच तिने रौद्ररूप धारण केले. मात्र, कर्मचाऱ्यांनी प्रसंगावधान राखत तातडीने कारवाई केल्यामुळे आश्रमात राहणाऱ्या सुमारे ४० ज्येष्ठ नागरिक आणि मनोरुग्णांना सुरक्षित बाहेर काढण्यात यश आले. या आगीत काही प्रमाणात साहित्याचे नुकसान झाले असले तरी सुदैवाने कोणतीही जीवितहानी किंवा दुखापत झालेली नाही.