पोलीस उपनिरीक्षक पदाच्या (पीएसआय) भरती परीक्षेसाठी वयोमर्यादा वाढण्याबाबत गेल्या काही दिवसांपासून मागणी होऊनही राज्य सरकारने निर्णय घेतलेला नाही. त्यामुळे अस्वस्थ झालेल्या स्पर्धा परीक्षा उमेदवारांनी आक्रमक भूमिका घेत शास्त्री रस्ता येथे आंदोलन केले. पोलिसांनी हस्तक्षेप करून काही आंदोलकांना ताब्यात घेतले. पोलिसांच्या कारवाईनंतर आंदोलक स्पर्धा परीक्षा उमेदवारांना आंदोलन थांबवावे लागले.

महाराष्ट्र लोकसेवा आयोगातर्फे (एमपीएससी) ४ जानेवारीला महाराष्ट्र गट ब अराजपत्रित सेवा संयुक्त पूर्व परीक्षा २०२५ ही परीक्षा घेतली जाणार आहे. मात्र जाहिरात २९ जुलै २०२५ ला प्रसिद्ध झाली आहे. त्यात वय मर्यादा गणना दिनांक ०१ नोव्हेंबर २०२५ अशी आहे. जाहिरात येण्यासाठी सात महिने उशीर झाला. त्यामुळे अनेक उमेदवार अपात्र ठरून संधी हिरावली जाणार असल्याचे सांगत स्पर्धा परीक्षा उमेदवारांनी वयोमर्यादा वाढवण्याची, वयोमर्यादा गणना करण्याचा कालावधी १ जानेवारी २०२५ गृहित धरण्याची मागणी केली.