NEET पेपरफुटी प्रकरणात पी. व्ही. कुलकर्णी याला अटक केल्यानंतर तोच या प्रकरणाचा मुख्य सूत्रधार असल्याची माहिती उघड झाली होती. त्याला पुण्यातून अटक केली होती. त्याच्या दुसऱ्याच दिवशी सीबीआयने पुन्हा पुण्यात मोठी कारवाई केली आहे. जीवशास्त्राच्या प्राध्यापिका मनिषा मांढरे हिला सीबीआयने आज, शनिवारी पुण्यातून अटक केली आहे.
महत्त्वाचं म्हणजे मनिषा मांढरेचा NTA च्या तज्ज्ञ पॅनेलमध्ये समावेश होता. पेपर सेट करणे तसंच पडताळणी प्रक्रियेतील त्यांच्या भूमिकेचा गैरवापर करून गोपनीय माहिती उघड केल्याचा संशय आहे. या प्रकरणी आतापर्यंत ९ जणांना अटक करण्यात आली आहे. या आरोपींच्या चौकशीतून पेपरफुटी प्रकरणाचे धागेदोरे आता थेट परीक्षा घेणाऱ्या संस्थेच्या अंतर्गत यंत्रणेपर्यंत पोहोचल्याचं स्पष्ट झालं आहे.