गणेश कवडे, मुंबई, साम टीव्ही

विधानसभा निवडणुकीच्या रणधुमाळीत महाविकास आघाडी आणि महायुतीचं जागावाटप चर्चेच्या फेऱ्यांमध्ये अडकलं आहे. दिल्ली आणि महाराष्ट्रातही वरिष्ठ नेत्यांकडून जागावाटपाचा हा पेच सोडवण्याचा प्रयत्न केला जात आहे. पण तो अद्याप सुटलेला दिसत नाही. उमेदवारी अर्ज भरण्याची मुदत जवळ आली आहे, पण महाविकास आघाडी आणि महायुतीच्या जागावाटपाचं काही जुळून येत नाही. दोन्ही बाजूने फॉर्म्युला सांगितला जात आहे. पण त्यावर शिक्कामोर्तब होत नाही. आता महायुतीचा जागावाटपाचा फॉर्म्युला अंतिम टप्प्यात आल्याचे सूत्रांकडून सांगण्यात येत आहे.

भाजप १५३, शिवसेना (शिंदे गट) ८० आणि राष्ट्रवादी काँग्रेस (अजित पवार गट) ५५ जागांवर लढणार असल्याचे सूत्रांकडून सांगण्यात आले आहे. पण हा फॉर्म्युला अंतिम टप्प्यात आला असला तरी, तो अंतिम झालेला नाही, असेही सूत्रांकडून स्पष्ट करण्यात आले आहे. नुकतीच भाजपने महाराष्ट्र विधानसभा निवडणुकीसाठी उमेदवारांची दुसरी यादी जाहीर केली आहे. यात २२ मतदारसंघांचा समावेश आहे.