ऐन निवडणुकीत कोरेगाव विधानसभा मतदारसंघातील राजकीय वातावरण चांगलेच तापलेले पाहायला मिळत आहे. सध्या निवडणुकीच्या प्रचाराची रणधुमाळी सर्व ठिकाणी सुरू असून महायुतीचे उमेदवार महेश शिंदे आणि महाविकास आघाडीचे उमेदवार शशिकांत शिंदे हे प्रचारात व्यस्त आहेत. मात्र अलीकडच्या काळात दोघांमध्ये आरोप प्रत्यारोप सुरू आहेत. शिवसेनेचे उमेदवार महेश शिंदे यांच्या बाबत एका युवकाने आक्षेपार्ह पोस्ट सोशल मीडियाच्या स्टेटसवर ठेवल्याच्या कारणावरून या मतदारसंघातील वातावरण चांगलेच तापल्याचे पाहायला मिळाले. या प्रकरणात संबंधित युवकावर महेश शिंदे यांच्या कार्यकर्त्यांनी तक्रारी अर्ज दाखल केल्यानंतर पोलीस ठाण्यामध्ये बोलवून पोलिसांनी बेदम मारहाण केल्याचा आरोप शशिकांत शिंदे यांच्यासह कार्यकर्ते केला आहे. त्यानंतर आज पुसेगाव पोलीस ठाण्यासमोर शेकडो कार्यकर्त्यांना एकत्र घेऊन शशिकांत शिंदे यांनी ठिय्या आंदोलन केलं आहे. संबंधित पोलीस अधिकाऱ्याला जोपर्यंत निलंबित करत नाही तोपर्यंत हे आंदोलन संपणार नाही, अशी भूमिका शशिकांत शिंदे आणि कार्यकर्त्यांनी घेतल्यामुळे पुसेगाव परिसरात तणावाचं वातावरण निर्माण झालं आहे.

Edited By Rakhi Rajput