महाराष्ट्र राज्य विधीमंडळाचं पावसाळी अधिवेशन सुरू असून, विरोधक सुरुवातीपासूनच आक्रमक झाले आहेत. पावसाळी अधिवेशनात महाविकास आघाडीकडून भाजप-शिवसेना आणि राष्ट्रवादी काँग्रेसच्या महायुती सरकारवर आरोपांची बरसात केली जात आहे. विधीमंडळाचं कामकाज सुरू होण्याआधीच आज, मंगळवारी विरोधकांनी विधानसभेच्या पायऱ्यांवरच सरकारविरोधात घोषणाबाजी सुरू केली. भ्रष्टाचार आणि त्यात क्लीन चीट देत असल्याचा आरोप करत विरोधकांनी भाजपला लक्ष्य केलं. भाजपच्या वॉशिंग मशीनमध्ये स्वच्छ करून घेतलेल्या नेत्यांना क्लीन चीट मिळते, असा आरोप करत, विरोधी पक्षाच्या आमदारांनी भाजपविरोधात जोरदार घोषणाबाजी केली.