उद्धव ठाकरे आणि आदित्य ठाकरे यांच्याकडे एवढे पैसे येतात कुठून? असा सवाल भाजप नेते नारायण राणे यांनी उपस्थित केला आहे. आम्ही शिवसेना संपवण्यासाठी बसलोय, असं म्हणत नारायण राणे यांनी ठाकरेंवर घणाघात केला आहे. मुंबईतील एका कार्यक्रमांदरम्यान नारायण राणे यांनी माध्यमांशी संवाद साधला यावेळी त्यांनी थेट उद्धव ठाकरे यांच्यावर निशाणा साधला.

बोरिवलीतील कोरा केंद्र येथे आयोजित ट्रेड फेअरला केंद्रीय मंत्री आणि खासदार नारायण राणे यांनी भेट दिली. यावेळी त्यांनी राज्यातील राजकारणावर भाष्य करत शिवसेना ठाकरे गटाचे पक्षप्रमुख उद्धव ठाकरे यांच्यावर जोरदार टीका केली. उद्धव ठाकरे यांचे शिवसेना संपवण्यासाठीच आम्ही बसलो आहे असे नारायण राणे यांनी सांगितले.

उद्धव ठाकरेंवर टीका करताना नारायण राणे म्हणाले की, 'उद्धव ठाकरे आणि आदित्य ठाकरे यांच्याकडे एवढा पैसा येतो तरी कुठून? त्यांची उत्पन्नाची साधनं काय आहेत? जनतेने हे जाणून घ्यायला हवं.' तसंच, त्यांनी राज्यातील अनेक राजकीय घडामोडींवर भाष्य केलं. उद्धव ठाकरे यांच्या नेतृत्वावरही प्रश्नचिन्ह उपस्थित करत त्यांनी शंका व्यक्त केली. 'ज्यांच्याकडे कोणताही प्रशासनाचा अनुभव नाही, अशा लोकांनी महाराष्ट्र चालवला होता.', असा शब्दात त्यांनी ठाकरेंवर टीका केली.