सांगली जिल्ह्यातील इस्लामपूरच्या राजकारणात मोठी घडामोड घडली आहे. भाजपसोबत एकनिष्ठ असलेले माजी नगरसेवक विक्रम पाटील यांचे बंधू महेश पाटील आणि माजी नगरसेवक विजय कुंभार यांनी भाजपला सोडचिठ्ठी दिली आहे. आमदार जयंत पाटील यांच्या उपस्थितीत या दोन्ही नेत्यांनी राष्ट्रवादी काँग्रेस शरदचंद्र पवार पक्षात प्रवेश केला. या पक्षबदलामुळे ईश्वरपूर शहरातील राजकीय समीकरणे बदलण्याची शक्यता निर्माण झाली असून, याला जयंत पाटलांनी भाजपला दिलेला मोठा धक्का मानले जात आहे. या प्रवेशावर बोलताना जयंत पाटील म्हणाले, 'महेश पाटील हे जिद्दी कार्यकर्ते, तर विजय कुंभार हे अभ्यासू नगरसेवक आहेत. या शहरातील रखडलेली कामे मार्गी लावून शहराचा विकास अधिक गतिमान करण्याचा आमचा प्रयत्न आहे'.