नांदेडमधील शिदेसेनेच्या आढावा बैठकीत आमदार संतोष बांगरांनी पक्षाला घरचा आहेर दिला. मंत्र्यांच्या डोक्यात हवा गेलीय, डोक्यात हवा गेलेल्या मंत्र्यांना घरी बसवा असं संतोष बांगर यांनी म्हटलं आहे. विशेष म्हणजे खासदार श्रीकांत शिंदे, मंत्री गुलाबराव पाटील, मंत्री उदय सामंत यांच्या समोरच त्यांनी हे विधान केलं. त्यामुळे आता राजकीय वर्तुळात जोरदार चर्चा रंगली आहे.

शिंदेसेनेच्या तीन जिल्ह्यातील पदाधिकाऱ्यांची नांदेड शहरात आढावा बैठक आयोजित करण्यात आली होती. या आढावा बैठकीत बोलताना हिंगोलीचे आमदार संतोष बांगर यांनी शिंदे गटाच्या मंत्र्यांना घरचा आहेर दिला. काही मंत्र्यांच्या डोक्यात हवा गेली आहे ते उंटावरून शेळ्या हाकण्याचे काम करत आहेत. फोन उचलत नाहीत. अशा मंत्र्यांना घरचा रस्ता दाखवण्याची मागणी बांगर यांनी केली. ही मागणी त्यांनी खासदार श्रीकांत शिंदे यांच्यासमोर करण्यात आली.