अंबरनाथमध्ये मतदानादरम्यान गोंधळ झाला. ईव्हीएम मशीन आणणाऱ्या कर्मचाऱ्यांकडे बोगस आयकार्ड सापडले. या प्रभागातील सर्व उमेदवारांनी आक्षेप घेतला. अंबरनाथच्या ग्रीन सिटी प्रभाग क्रमांक २९ मध्ये हा अजब प्रकार घडला. या ठिकाणी ईव्हीएम मशीन घेऊन येणाऱ्या कर्मचाऱ्यांकडेच बोगस आयकार्ड सापडले आहे. या ठिकाणी ईव्हीएम मशीन बंद पडल्यामुळे दुसरे मशीन मागवण्यात आले. मात्र जे कर्मचारी मशीन घेऊन आले त्यांच्या आयकार्डवर फोटो आणि नाव तसंच सही आणि शिक्का देखील नव्हता. त्यामुळे सर्वच उमेदवारांनी निवडणूक अधिकाऱ्यांना जाब विचारला. सध्या मतदान केंद्रावर गोंधळाचे वातावरण असून उमदेवार आणि कार्यकर्ते संतप्त झाले आहेत. तर, अंबरनाथ कोहोज गाव येथील फादर एंजल्स स्कूल येथे काही पक्षांच्या गाड्या आत पाठवल्या जात असल्याने शिवसेना आणि काँग्रेस या पक्षाच्या कार्यकर्त्यांमध्ये राडा झाला. लागलीच पोलिसांनी मदत करून सर्वांना येथून बाहेर काढल्याने वाद सध्या तरी मिटला आहे.