शिंदे गटातील आमदारांच्याच मतदारसंघात त्यांच्या राजकीय प्रतिस्पर्धकांना भाजप आणि राष्ट्रवादी काँग्रेसमध्ये प्रवेश दिल्यामुळे महायुतीत अंतर्गत मतभेद उफाळून आले आहेत. सातारा, रायगड, मालेगाव, जळगाव आणि छत्रपती संभाजीनगरमध्ये हे पक्षप्रवेश झाले आहेत. ज्यामुळे शिंदे सेनेत तीव्र नाराजी पसरली आहे. मंत्री शंभूराज देसाई यांच्या विरोधात सत्यजित पाटणकर, दादा भुसे यांच्या विरोधात अद्वैय हिरे आणि मंत्री संजय शिरसाट यांच्या विरोधात राजू शिंदे यांना भाजपने प्रवेश दिला आहे. याशिवाय, इतरही मतदारसंघांमध्ये शिंदे गटाच्या आमदारांसमोर त्यांच्याच मित्रपक्षाने आव्हान उभे केल्याने युतीमधील संघर्ष वाढला आहे. या 'मेगाभरती'वर शिंदे गटाने उघडपणे आक्षेप घेतला असून, या घडामोडींमुळे महायुतीतील अंतर्गत तणाव भविष्यात वाढण्याची शक्यता निर्माण झाली आहे.