स्टँडअप कॉमेडियन कुणाल कामराने उपमुख्यमंत्री एकनाथ शिंदे यांच्यावर विडंबनात्मक टीका केल्यानंतर शिंदेंच्या शिवसैनिकांनी कुणाल कामराच्या शोच्या ठिकाणी तोडफोड केली. यावर अंजली दमानिया यांनी ट्विट करत आपले सडेतोड मत व्यक्त केले आहे. सत्तेत असताना कायदा हातात घेऊन हॉटेलमध्ये जाऊन शिवीगाळ करणं व त्या हॉटेलची तोडफोड करणे याला गुंड प्रवृत्ती म्हणतात, असं अंजली दमानिया म्हणाल्या.

तसेच या घटनेचा त्यांनी निषेध केला आहे. दमानिया म्हणाल्या, कुणाल कामरा जे म्हणाले ते जर आवडलं नसेल तर त्यांच्याविरुद्ध कायद्याने लढणं अपेक्षित आहे. पण स्वतः सत्तेत असताना कायदा हातात घेऊन हॉटेलमध्ये शिवीगाळ करणं, तोडफोड करणं ह्याला गुंड प्रवृत्ती म्हणतात, जी आपल्याला दिसली. कामरावर सोडा, आधी शिंदे गटाच्या ह्या सगळ्यांवर FIR झाला पाहिजे. त्या हॉटेलचे झालेले नुकसान सुद्धा शिंदेंनी भरून दिले पाहिजे. आपण लोकशाहीत राहतो आणि इथे कायद्याचे राज्य राहील, गुंडगिरीचे नाही, असंही अंजली दमानिया म्हणाल्या.