महाराष्ट्रात अलीकडेच विधानसभा निवडणुका झाल्या. या निवडणुकीत महाविकास आघाडीला धूळ चारून भाजप, अजित पवार गट आणि शिंदे गट यांची महायुती सत्तेत आली. आता मिनी विधानसभा म्हणून ओळखल्या जाणाऱ्या महापालिका निवडणुकांच्या तयारीला सर्वच प्रमुख राजकीय पक्ष लागले आहेत. भाजपकडून जोरदार तयारी सुरू आहे. महापालिका निवडणुकांमध्ये महायुती होणार का, असा प्रश्न सध्या विचारला जात आहे. त्यात सर्वच प्रमुख पक्षांचे नेते महायुतीबाबत वेगवेगळी वक्तव्ये करीत आहेत. त्यामुळं आगामी महापालिका निवडणुकांआधी महाराष्ट्रात पुन्हा राजकीय भूकंप होण्याचे संकेत मिळत आहेत.

युतीबाबत नीलम गोऱ्हे यांनी अलीकडेच एक विधान केलं. त्याला आता भाजप प्रदेशाध्यक्ष चंद्रशेखर बावनकुळे यांनी दुजोरा दिला आहे. नंतरच्या काळात युती होईल की नाही हा प्रश्न मला पडत नाही. मुंबई, ठाण्यात युती होईल, पण बाकीच्या ठिकाणी युती होणं अवघड होईल. झालीच तर आनंद आहे, असं गोऱ्हे म्हणाल्या होत्या.

तर त्यांच्या वक्तव्याला बावनकुळे यांनी दुजोरा दिला आहे. त्यांचं म्हणणं काय चूक नाही. स्थानिक स्वराज्य संस्थांमध्ये सर्वांना वाटते की आम्ही लढलो पाहिजे. आमची भावना काय आहे महायुती झाली पाहिजे, महायुतीचा महापौर असला पाहिजे, पण ज्या ठिकाणी होत नाही, त्या ठिकाणी मैत्रिपूर्ण लढती होतील, असे बावनकुळे म्हणाले. दुसरीकडे विरोधी पक्ष असलेल्या ठाकरे गटाचे खासदार संजय राऊत यांनी यावर टीकास्त्र सोडलंय.