कॉंग्रेसचे नेते विजय वडेट्टीवार यांनी शिंदेसेनेबाबत केलेल्या खळबळजनक दाव्यानंतर आता खासदार संजय राऊत यांनी देखील त्यांच्या या विधानाला दुजोरा दिला आहे. शिंदेंच्या शिवसेनेची गरज संपली आहे. त्यामुळे त्यांना बाजूला सारतील आणि नवीन उदय पुढे येईल असा दावा, वडेट्टीवार यांनी केला आहे. याच विधानाला संजय राऊत यांनी दुजोरा देत आणखी मोठा दावाही केला आहे. उदय सामंत यांच्यासोबत २० आमदार असल्याचा खळबळजनक दावा राऊतांनी आज पत्रकारांशी बोलताना केला आहे.

उद्धव ठाकरे यांना संपवून एकनाथ शिंदे यांना आणलं, आता त्यांना संपवून नवीन 'उदय' पुढे येईल. त्याला पुढे आणण्याचा प्रयत्न होईल. उद्याच्या शिवसेनेचा नवा, तिसरा उदय तुम्हाला दिसेल, असा दावा विजय वडेट्टीवार यांनी केल्यानंतर आता त्यांच्या या वक्तव्याला उद्धव ठाकरे गटाचे खासदार संजय राऊत यांनी दुजोरा दिला आहे. आज पत्रकारांशी बोलताना राऊत म्हणाले की, उदय सामंत यांच्यासोबत २० आमदार आहेत. जेव्हा एकनाथ शिंदे शपथविधीच्यावेळी रूसले होते. तेव्हाच हा उदय होणार होता. तेव्हाच हे निश्चित झालं होतं. पण एकनाथ शिंदे सावध झाले आणि झाकली मूठ सव्वा लाखाची, असा मोठा दावाच आता संजय राऊत यांनी केला आहे.