ऐकलंत.....गुलाबराव पाटलांनी जाहीरपणे ही नाराजी बोलून दाखवल्यानंतर पुढच्या काही तासांत रायगड आणि नाशिकच्या पालकमंत्रिपदाला स्थगिती देण्यात आली. रायगडच्या पालकमंत्रिपदी राष्ट्रवादीच्या आदिती तटकरेंची नियुक्ती करण्यात आली. मात्र अपेक्षेप्रमाणे शिवसेनेच्या भरत गोगावलेंनी उघडपणे तीव्र नाराजी व्यक्त केली. त्यांच्या कार्यकर्त्यांनी तर थेट रास्ता रोकोच केला. त्यामुळे हा वाद अधिकच पेटला. त्यावर रस्ते रोखण्याची आमची संस्कृती नसल्याचा टोला लगावत मुख्यमंत्र्यांशी चर्चा करणार असल्याचं सुनील तटकरेंनी सांगितलं. तर अपेक्षा ठेवण्यात गैर काय असा सवाल करत गोगावलेंच्या दावेदारीचं उपमुख्यमंत्री एकनाथ शिंदेंनी जोरदार समर्थन केलंय.

तर दुसरीकडे नाशिकमध्येही पालकमंत्रिपदाचा घोळ सुरू झालाय. गिरीश महाजन यांच्या पालकमंत्रिपदाला स्थगिती दिल्यानंतर राष्ट्रवादीचे मंत्री माणिकराव कोकाटे यांनी नाशिकवर दावा ठोकलाय. जिल्ह्यात सर्वाधिक आमदार असल्यामुळे पालकमंत्रिपद राष्ट्रवादीला देण्याची मागणी त्यांनी केली

नाशिकमध्ये २०२७ मध्ये कुंभमेळा होणार आहे. यासाठी केंद्राकडून हजारो कोटींचा निधी मिळतो. त्यामुळेच भाजप आणि राष्ट्रवादीत नाशिकच्या पालकमत्रिपदावरून रस्सीखेच सुरू असल्याचं बोललं जातंय. त्यामुळे नाशिकसह कुंभमेळ्याचंही पालकत्व कुणाकडे जाणार याचीच सर्वांना उत्सुकता लागलीय.