'लाडकी बहिण' योजनेतून लाभ घेणाऱ्या सरकारी महिला कर्मचाऱ्यांना सरकारने मोठा दणका दिला आहे. शासनाच्या अटींनुसार, ही योजना आर्थिकदृष्ट्या दुर्बल आणि खासगी क्षेत्रात काम करणाऱ्या अथवा बेरोजगार महिलांसाठी आहे. मात्र, तब्बल २ हजार २८९ महिला सरकारी कर्मचाऱ्यांनी ही अट डावलून लाभ घेतल्याचं समोर आलं आहे. लाडकी बहीन योजना सुरू झाल्यापासून अनेक महिलांनी अर्ज केला होता. मात्र ही योजना फक्त गरजू आणि वंचित महिलांसाठी असून देखील सरकारी नोकरी करणाऱ्या महिलांनी देखील यासाठी अर्ज केला होता. ही योजना सुरू झाल्यापासून या महिला लाभ घेत होत्या. या सर्व प्रकारची सरकारकडून दखल घेतली होती आणि या अर्जदारांची पडताळणी सुरू होती. अशातच आज 2 हजार सरकारी नोकरीवर असणाऱ्या महिलांना या यादीतून वगळण्यात आले आहे.