पावसाळी पर्यटनाचा आनंद घेण्यासाठी माथेरान आणि कर्जतकडे येणाऱ्या पर्यटकांची मोठी गर्दी पाहायला मिळत आहे. यामुळे कर्जत ते मुरबाड महामार्गावर वाहनांची प्रचंड कोंडी निर्माण झाली असून, पाच ते सहा किलोमीटरपर्यंत वाहनांच्या लांबच लांब रांगा लागल्या आहेत.

विशेषतः माथेरानहून नेरळच्या दिशेने जाणाऱ्या पर्यटकांच्या वाहनांची संख्या लक्षणीय वाढली आहे. दुसरीकडे, अनेक पर्यटक मुंबईच्या दिशेने परतत असल्याने महामार्गावरील वाहतूक व्यवस्थेवर ताण आला आहे. वाहनांच्या मोठ्या प्रमाणातील गर्दीमुळे स्थानिक नागरिक आणि प्रवाशांनाही या कोंडीत अडकल्याचे चित्र आहे. वाहतूक पोलीस आणि प्रशासनाकडून वाहतूक सुरळीत करण्याचे प्रयत्न सुरू आहेत, मात्र पर्यटकांची वाढती संख्या आणि अरुंद रस्ते यामुळे कोंडी कमी होण्यास वेळ लागत आहे. सुटीच्या दिवशी पावसाळी पर्यटनासाठी मोठ्या प्रमाणात पर्यटक माथेरान, कर्जतकडे आकर्षित होत असल्याने अशी वाहतूक कोंडी वारंवार होत असल्याचे स्थानिकांकडून सांगण्यात येत आहे.