रत्नागिरी जिल्ह्यात सुरू असलेल्या सततच्या मुसळधार पावसामुळे जगबुडी नदीची पाणीपातळी झपाट्याने वाढली असून, ती 5.50 मीटरवर पोहोचली आहे. ही पातळी इशारा पातळीपेक्षा अधिक असल्याने नदीकाठच्या नागरिकांना प्रशासनाकडून सतर्कतेचा इशारा देण्यात आला आहे. खेड तालुक्यात रात्रभर पडलेल्या पावसामुळे नदीला मोठा पूर आला आहे. खेड बाजारपेठेतील काही भागांमध्ये पाणी शिरले आहे.

हवामान विभागाने आज रत्नागिरी जिल्ह्यासाठी ऑरेंज अलर्ट जारी केला आहे. पुढील २४ तासात मुसळधार पावसाची शक्यता वर्तवण्यात आली आहे. प्रशासनाकडून बचाव पथके सज्ज ठेवण्यात आली असून, नदीकाठच्या गावांमध्ये मदतकार्य सुरु ठेवण्यात आले आहे. नागरिकांनी नदी जवळ जाणे टाळावे, अफवांवर विश्वास ठेवू नये आणि अधिकृत सूचनांचे पालन करावे, असे अहवान करण्यात आले आहे. परिस्थितीवर प्रशासनाचे बारकाईने लक्ष असून, आवश्यक त्या उपाययोजना करण्यात येत आहेत.