नांदेड जिल्ह्यात पुन्हा एकदा मुसळधार पावसाने हजेरी लावली आहे. मध्यरात्री पासून जिल्ह्यात सुरु झालेल्या तुफान पावसाच्या बॅटिंगमुळे नांदेड शहरातील रस्ते जलमय झाले असून, काही ठिकाणी रस्त्यांना नदीचे स्वरूप आले आहे. गेल्या तीन दिवसांपासून पावसाने विश्रांती घेतली होती. पण मात्र परतीच्या पावसामुळे पुन्हा नांदेडसह जिल्ह्यातील सर्वच तालुक्यांना पावसाने झोडपले आहे. पुराने नुकसान झालेल्या नांदेड जिल्ह्यात पुन्हा एकदा पावसानं थैमान घातले आहे. सतत कोसळणा-या पावसामुळे नागरिकांच्या दैनंदिन जीवनावर परिणाम झाला असून, अनेक ठिकाणी पाणी साचल्याने वाहतुकीला आणि नागरिकांनासुध्दा अडथळे निर्माण होत आहेत.