नंदुरबार शहरासह संपूर्ण जिल्ह्यात रविवारी पहाटेपासूनच मुसळधार पाऊस सुरू आहे. पावसामुळे जनजीवन विस्कळीत झालं असून नद्यानाल्यांना मोठा पूर आलाय. अनेक सखल भागात पाणी शिरल्याने नागरिकांची मोठी ताराबंळ उडाली आहे. अनेक भागातील रस्त्यांवर कमरेइतकं पाणी साचलं.

दुसरीकडे नळवा रस्ता परिसरात असलेला रेल्वे बोगदा पूर्णत: पाण्याखाली गेला. त्यामुळे या बोगद्यातून वाहतूक बंद करण्यात आली आहे. गेल्या 24 तासापासून सुरू असलेल्या पावसामुळे नवापूर तालुक्यातील नेसू नदीला देखील महापूर आलाय. नदीने धोक्याची पातळी ओलांडली असून पुरात पाण्यात पाईपांचा मोठा गठ्ठा वाहून आलाय.

पाईपांचा हा गठ्ठा बाहेर काढून तो घेऊन जाण्यासाठी धावपळ पाहण्यास मिळाली. अनेकांनी आपला जीव धोक्यात घालून स्टंटबाजी केली. सध्या ग्रामीण भागात जलजीवन मिशनचे काम अपूर्ण असून त्याचे साहित्य उघड्यावर पडले आहेत. हे साहित्य नदीच्या पुरात वाहून आल्याचा प्राथमिक अंदाज व्यक्त केला जात आहे.