बुलढाणा जिल्ह्यातील लोणार तालुक्यात सोमवारी रात्री जोरदार पावसाने हाहाकार माजवला. पांग्रा डोळे, टीटवी, नांद्रा आणि परिसरातील गावांमध्ये मुसळधार पाऊस कोसळल्यानं जनजीवन विस्कळीत झालं आहे. हिरवड गावाला पुराच्या पाण्याने वेढा घातल्याने गावाचा इतर भागांशी संपर्क तुटला आहे.

पांग्रा डोळे गावातही घरामध्ये पाणी शिरल्याने घरगुती साहित्याचं मोठं नुकसान झालं आहे. नागरिकांनी प्रशासनाकडे वारंवार तक्रारी करूनही अद्याप कोणतीही ठोस उपाययोजना झालेली नाही, अशी संतप्त प्रतिक्रिया ग्रामस्थांनी व्यक्त केली आहे. दरम्यान, टीटवी, कुंडफळ, बोरखेडी आणि गुंधा हे लघु प्रकल्प १००% भरले असून, प्रकल्पाखालील गावांना प्रशासनाने सतर्क राहण्याचा इशारा दिला आहे. हवामान विभागाकडून पुढील काही तास मुसळधार पावसाचा इशारा देण्यात आल्यामुळे नागरिकांमध्ये भीतीचं वातावरण पसरलं आहे.