नाशिकच्या गंगापूर रोड भागातील संत कबीर नगर झोपडपट्टी आणि वन विहार सोसायटीमध्ये बिबट्या शिरला होता. आता मिळालेल्या माहितीनुसार दोन बिबटे होते. यापैकी एक बिबट्या पळून गेला. तर दूसरा बिबट्या हा नागरी वस्तीत शिरला. त्यानंतर वनविभागाच पथक आणि पोलिसांनी घटनास्थळी धाव घेत मोठ्या शिताफीने त्याला जेरबंद केले.

याच ठिकाणी राज्याचे आपत्ती व्यवस्थापन मंत्री गिरीश महाजन हे देखील पोहोचले. यावेळी महाजन म्हणाले, बिबट्यांच्या वाढत्या समस्येला 'आपत्ती' म्हणून घोषित करून, हा विषय आपल्या विभागाकडे सोपवण्याची मागणी मुख्यमंत्री देवेंद्र फडणवीसांकडे केली. महाजन यांनी मंत्रिमंडळ बैठकीत यावर चर्चा झाल्याचे सांगितले.

एका मादी बिबट्याने वर्षाला आठ पिल्लांना जन्म दिल्यास लोकसंख्या किती वेगाने वाढेल, यावर त्यांनी चिंता व्यक्त केली. मानवी वस्तीत येऊन लहान मुले आणि पाळीव प्राण्यांवर होणारे हल्ले रोखण्यासाठी पिंजऱ्यांची आणि मनुष्यबळाची संख्या वाढवणे, तसेच पकडलेल्या बिबट्यांना गुजरातसारख्या सुरक्षित ठिकाणी स्थलांतरित करणे यांसारख्या उपायांवर शासन विचार करत असल्याचे ते म्हणाले. बचावकार्यात नागरिकांनी अडथळा न आणण्याचे आवाहनही त्यांनी केले.