नाशिकमधून एक मोठी बातमी समोर येत आहे. शिंदे गटाच्या माजी आमदार निर्मला गावित यांचा अपघात झाला आहे. आपल्या नातवाला घराबाहेर फिरवत असताना मागून आलेल्या एका चारचाकी गाडीने त्यांना धडक दिली. ज्यामध्ये त्या गंभीर जखमी झाल्या आहेत. गावित यांच्यावर नाशिकमधील एका खासगी रुग्णालयाच्या अतिदक्षता विभागात (ICU) उपचार सुरू आहेत.

या घटनेबाबत अधिक माहिती अशी की, आपल्या नातवासोबत घराबाहेर फिरत असताना कार चालकाने त्यांना उडवलं. या अपघाताचे सीसीटीव्ही फुटेजही समोर आले असून या प्रकरणी मुंबईनाका पोलीस ठाण्यात तक्रार दाखल करण्यात आली आहे. हा अपघात चालकाच्या निष्काळजीपणामुळे घडला की यामागे अन्य काही कारण आहे याचा पोलीस सध्या तपास करत आहेत.