बालाजी सुरवसे, धाराशिव, साम टीव्ही

राज्यातील जिल्हा परिषद आणि पंचायत समिती निवडणुका होत आहेत. या निवडणुकांआधी ईव्हीएमच्या मुद्द्यानं पेट घेतला आहे. ईव्हीएमविरोधात धाराशिवमध्ये तरुणांनी आंदोलन केलं आहे. सोलापूर-धुळे महामार्गावर टायर पेटवण्यात आले. धाराशिवच्या चोराखळीत तरुणांनी हे आंदोलन केलं. ईव्हीएम हटवून बॅलेट पेपरवर मतदान घेण्यात यावं, अशी मागणी करण्यात आली.

ईव्हीएम हटवण्याच्या मागणीसाठी सुरू असलेल्या आंदोलनाला पाठिंबा देण्यासाठी तरुण वर्ग आक्रमक झाला आहे. धर्मवीर संभाजीराजे शौर्य प्रतिष्ठानचे अध्यक्ष बाळराजे आवारे पाटील यांच्या उपोषणाला पाठिंबा देण्यासाठी तरुण रस्त्यावर उतरले आहेत. धाराशिवच्या कळंब तालुक्यातील तांदळवाडी येथे ईव्हीएमविरोधात उपोषण सुरू आहे. बाळराजे आवारे पाटील यांच्याकडून सुरू असलेल्या आंदोलनाला पाठिंबा देण्यासाठी हे आंदोलन करण्यात आले आहे. या दरम्यान कोणताही अनुचित प्रकार घडला तर निवडणूक आयोग जबाबदार असेल, असा इशारा आंदोलकांनी प्रशासनाला दिला आहे.