नांदणी गावातील श्री जिनसेन मठामधील माधुरी हत्तीला जामनगर येथील वनतारा उद्यानामध्ये हलविल्याने कोल्हापूर जिल्ह्यासह महाराष्ट्रात देखील हळहळ व्यक्त होत आहे. यानंतर अनेक लोकप्रतिनिधी देखील एकवटले असून या हत्तीला परत आणण्यासाठी प्रयत्न सुरू आहे. तसेच अंबानी समूहाच्या निषेधार्थ जैन समाजाने देखील मोठा संताप व्यक्त केला आहे. नांदणी मठातील महादेवी हत्तीनीला वनतारामध्ये घेऊन गेल्यानंतर गावकऱ्यांना आता गावच सुनं सुनं वाटू लागले आहे. महादेवी हत्तीनीच्या आठवणीने अनेक महिलांच्या अश्रूंचा बांध फुटला. साम टीव्ही सोबत बोलत असताना महादेवीला जेऊ खाऊ घालणाऱ्या महिला आणि सेवा करणाऱ्या महिलांनी महादेवीच्या आठवणी सांगताना रडू कोसळलं.