एकनाथ शिंदे यांच्या शिवसेनेत प्रवेश केलेले सर्व 6 खासदार आगामी लोकसभा निवडणूक शिवसेनेच्याच म्हणजे धनुष्यबाणाच्या चिन्हावर लढतील आणि पुन्हा महायुतीचे खासदार म्हणून निवडून येतील अशी घोषणा उपमुख्यमंत्री एकनाथ शिंदे यांनी केलीय. बंडखोर 6 खासदारांपैकी काही खासदार हे 2024 च्या निवडणुकीत शिंदेंच्याच उमेदवारांविरोधात, तर काही जण भाजप आणि अजित पवारांच्या राष्ट्रवादीच्या उमेदवारांचा पराभव करून संसदेत पोहोचले होते. हे खासदार आता शिंदे गटात आल्यामुळे, आगामी लोकसभा निवडणुकीत या जागांवर हक्क कोणाचा? भाजप आणि राष्ट्रवादी आपल्या हक्काच्या जागा शिवसेनेला सोडणार का? असे प्रश्न उपस्थित झालेत. या पक्षप्रवेश सोहळ्यात परभणीचे तीन वेळा निवडून आलेले खासदार संजय (बंडू) जाधव, शिर्डीचे खासदार भाऊसाहेब वाकचौरे, धाराशिवचे खासदार ओमराजे निंबाळकर, ईशान्य मुंबईचे खासदार संजय दिना पाटील, यवतमाळ-वाशीमचे खासदार संजय देशमुख आणि हिंगोलीचे खासदार नागेश पाटील आष्टीकर यांनी शिवसेनेत जाहीर पक्षप्रवेश केला.