नांदेड महापालिका निवडणुकीसाठीचा प्रचार आता रंगात आला. भाजपचे खासदार अशोक चव्हाण यांनी शिवसेनेवर थेट निशाणा साधला. नांदेडमध्ये प्रभाग क्रमांक 3 मध्ये शिवसेनेने अधिकृत उमेदवार दिले. मात्र या प्रभागात शिवसेना आमदार हेमंत पाटील, आमदार बाबुराव कदम यांनी अपक्ष उमेदवार मिनल पाटील यांच्या प्रचाराचा नारळ फोडला. त्यावरुन शिवसेनेत अंतर्गत वाद निर्माण झाला. त्यावर बोट ठेऊन अशोक चव्हाण यांनी शिवसेनेवर निशाणा साधला. प्रभाग तिन मध्ये काही उमेदवार जबरदस्तीने उभे केले, अधिकृत कोण आणि अनधिकृत कोण, हेच कळायला मार्ग नाही.

शिवसेनेचे तीन आमदार अनाधिकृत उमेदवाराचा प्रचार करतात. एक आमदार अधिकृत उमेदवाराचा प्रचार करतो. नेमकं उमेदवार कोण हेच कळत नाही. आधी आम्हाला शिव्या घालत होते. आता एकमेकांना शिव्या देत आहेत, अशा शब्दात अशोक चव्हाण यांनी शिवसेनेवर टीका केली. तीन-तीन चार-चार आमदारांची भूमिका वेगळी असेल आणि असे उमेदवार तुम्ही निवडून दिले तर नांदेडचा खेळ खंडोबा झाल्याशिवाय राहणार नाही असं अशोक चव्हाण म्हणाले.

रोज खा मटन आणि दाबा भाजपचे बटन असं अशोक चव्हाण म्हणाले. एकाचं मटन खाऊन दुसऱ्याला मतदान अशी भानगड करु नका, मी काही मटन देणार नाही असं अशोक चव्हाण म्हणाले. तुम्ही सगळ्यांचा अनुभव घेतला. सगळ्यात मोठा नगरसेवक अशोक चव्हाण तुमच्यासमोर उभा आहे. मला आणि माझ्या पक्षाला सत्ता द्या यांचे कान मी पकडू शकतो. तुमची कामे आमच्या नगरसेवकांनी केलीच पाहिजे ही माझी गॅरंटी आहे.असेही अशोक चव्हाण म्हणाले.