धुळे: शिरपूर येथील दुधामध्ये भेसळ असल्याची बातमी साम टीव्हीने प्रसारित केल्यानंतर अन्न व औषध प्रशासनाने याची दखल घेतली आहे. सोशल मीडियावर दुधातील भेसळ दाखवणारा व्हिडिओ व्हायरल झाल्यानंतर प्रशासनाच्या संपूर्ण टीमने शिरपूर येथे संबंधित दुकानात पोहोचून दुधाचे नमुने घेतले. नमुने तपासणीसाठी पाठवण्यात आले असून, या दुधात खरंच भेसळ आहे का याची शहानिशा करण्यात येणार आहे. शिरपूर पोलीस आणि अन्न आणि औषध प्रशासनाच्या संयुक्त कारवाईत जवळपास ५०० हून अधिक लिटर दूध फेकण्यात आले आहे. संबंधित दुकानाच्या गोडाऊनमध्ये साठवलेल्या उर्वरित दुधाची देखील तपासणी करण्यात आली आहे. भेसळ असल्याचा संशय असल्यामुळे आणि कोणालाही शारीरिक इजा होऊ नये यासाठी खबरदारी म्हणून उर्वरित दूध फेकण्यात आले आहे. सकाळी सोशल मीडियावर व्हायरल झालेल्या या व्हिडिओमुळे प्रशासनाच्या कारवाईला गती मिळाली असून, नागरिकांना सुरक्षितता सुनिश्चित करण्यासाठी योग्य ती पावले उचलण्यात आली आहेत.