अजित पवार गटाचे नेते आणि माजी मंत्री धनंजय मुंडे यांनी मराठा आंदोलक मनोज जरांगे पाटील यांनी केलेल्या आरोपांवर प्रत्युत्तर दिले आहे. मनोज जरांगेंना वाटतं की धनंजय मुंडे ह्या पृथ्वीतलावरच नसावा, यासाठीही धडपड आहे,' अशा शब्दात मुंडेंनी आपल्या भावना व्यक्त केल्या. मराठा समाजाला ओबीसीमधून आरक्षण मिळवण्यात फायदा आहे की ईडब्ल्यूएसमधून, यावर त्यांनी जरांगे यांना महाराष्ट्राच्या जनतेसमोर येण्याचे आव्हान दिले. यावेळी बोलताना, कोपर्डी बलात्काराच्या वेळी आपण पीडितेच्या बाजूने उभे राहिल्याची आठवण त्यांनी करून दिली. तसेच, आपण पालकमंत्री असताना बीड जिल्ह्यात ८० हजार कुणबी प्रमाणपत्रे वाटल्याचा दावाही त्यांनी केला. जरांगे यांच्यासोबत आपले वैयक्तिक वैर नसूनही, केवळ राजकीय आणि सामाजिक दृष्ट्या संपवण्यासाठीच हे सर्व सुरू असल्याचा आरोप मुंडेंनी केला आहे.