अमित शाह यांनी देवेंद्र फडणवीस यांच्याशी फोनवरुन बातचीत केल्याचं कळतंय. सूत्रांनी दिलेल्या माहितीनुसार अमित शाह आणि देवेंद्र फडणवीस यांच्या लोकसभा निवडणुकीच्या निकालाच्या पार्श्वभूमीवर बोलणं झाल्याचं सांगितलं जातंय. त्याचप्रमाणे देवेंद्र फडणवीस यांनी बुधवारी घेतलेल्या पत्रकार परिषदेत मोठं वक्तव्य केलं होतं. उपमुख्यमंत्रीपदापासून मोकळं करण्याचं सूचक विधान केल्यानंतर देवेंद्र फडणवीस आणि अमित शाह यांच्यातील फोनवरुन झालेला संवाद महत्त्वाचा मानला जातोय. दरम्यान, देवेंद्र फडणवीस हे दिल्लीला रवानाही झाले आहेत. ते दिल्लीत भाजप हायकमांडची भेट घेणार आहेत. या भेटीदरम्यान, नेमकं काय होतं? देवेंद्र फडणवीस उपमुख्यमंत्रीपदाचा राजीनामा देणार का? मोदी शाह भेटीत फडणवीसांच्या राजकीय निर्णयाची काय भूमिका स्पष्ट होते? याकडे सगळ्यांचं लक्ष लागलंय.