दिल्लीत सुरू असलेल्या आंदोलनाने आता उग्र रूप धारण केले आहे. जंतर-मंतर परिसरात विद्यार्थ्यांच्या आंदोलनादरम्यान पोलिसांनी लाठीचार्ज केल्याचा आरोप केला असून या घटनेनंतर परिस्थिती अधिकच तणावपूर्ण बनली आहे. आंदोलकांकडून पाठीवर व्रण, खूप मारलं असा दावा करणारा व्हिडिओही समोर आला आहे. दरम्यान कॉक्रोच जनता पार्टीचे संस्थापक अभिजीत दिपके यांनी आपले उपोषण मागे घेतले आहे. सामाजिक कार्यकर्ते सोनम वांगचूक यांना पोलिसांनी ताब्यात घेऊन रुग्णालयात दाखल केल्यानंतर दिपके यांनी उपोषण सुरू केले होते.

सध्या अभिजीत दिपके यांच्या नेतृत्वात कॉक्रोच जनता पार्टीचा मोर्चा संसदेच्या दिशेने निघाला आहे. या मोर्चातून केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी जोर धरत आहे. जंतर-मंतरवर विद्यार्थ्यांचे आंदोलन सुरू असतानाच आंदोलक संसदेच्या दिशेने निघाले. यावेळी पोलिसांनी त्यांना अडवण्याचा प्रयत्न केला आणि लाठीचार्ज केल्याचा आरोप करण्यात येत आहे. मात्र, लाठीचार्जनंतरही आंदोलक मागे हटण्यास तयार नसल्याचे दिसून येत आहे.

कितीही मारलं तरी आंदोलन थांबणार नाही, असा आक्रमक पवित्रा आंदोलकांनी घेतला असून, दिल्लीमध्ये कायदा-सुव्यवस्थेचा प्रश्न निर्माण होण्याची शक्यता व्यक्त केली जात आहे.