सागर निकवाडे, नंदूरबार | साम टीव्ही

अंगणवाडीतील मुलांच्या जीवाशी खेळ केला जात असल्याचा धक्कादायक प्रकार नंदूरबारमध्ये उघडकीस आला आहे. मुलांना दिल्या जाणाऱ्या पोषण आहारात मेलेली माशी आढळून आली. त्यामुळं जिल्ह्यातील अंगणवाडीत येणाऱ्या आदिवासी बालकांच्या आरोग्याचा प्रश्न ऐरणीवर आला आहे.

नंदूरबारमधील प्रकाशा गावातील अंगणवाडी क्रमांक ५ भवानी हट्टीमधील डाळ आणि भातामध्ये मेलेली माशी आढळली. पोषण आहारात जवळपास एक इंच लांब असलेली मेलेली माशी आढळली. बालकांना आणि गरोदर महिलांना पौष्टिक आहार मिळावा यासाठी महिला बालकल्याण विभागाकडून पोषण आहार दिला जातो. पण निकृष्ट दर्जाचा आहार दिला जातो, असा आरोप पालकांनी केला आहे. या प्रकरणी पालक शंकर भिल यांनी ग्रामविकास अधिकाऱ्यांकडे लेखी तक्रार केली. दोषींवर तात्काळ कारवाई करण्याची मागणी पालकांनी केली आहे. तर ग्रामविकास अधिकाऱ्याने संबंधित अंगणवाडीतील अंगणवाडी सेविकेकडून खुलासा मागवला आहे. यासंदर्भात प्रकाश गावचे ग्रामविकास अधिकारी बी जी पाटील यांना विचारणा केली असता संबंधित अंगणवाडी सेविकेला कायदेशीर नोटीस बजावण्यात आली असल्याचे सांगितले.