गोपाळ मोटघरे, आळंदी

वारकरी संप्रदायाचं श्रद्धास्थान असणाऱ्या देवाच्या आळंदीतील इंद्रायणी नदी किती प्रदूषित झालीये ही सांगणारी दृश्ये आता समोर आली आहेत. ही नदी इतकी जीवघेणी झालीये की या पाण्यात मृत माशांचा खच पाहायला मिळतोय.

आता या दूषित पाण्यानं माणसं मरायची वाट पाहणार का? असा सवाल स्थानिक ग्रामस्थांकडून विचारला जातोय. नदीत रसायनयुक्त पाणी सोडण्याचं पाप अनेक कंपन्या करताहेत. त्यामुळं ही नदी अनेकदा फेसाळते, जीवघेणी होते. वारकऱ्यांसाठी पवित्र मानल्या जाणाऱ्या इंद्रायणीनं मोकळा श्वास घ्यावा म्हणून अनेकदा आंदोलनं केली. हे पाहून मुख्यमंत्र्यांसह मंत्र्यांनी अनेक आश्वासनेही दिली. मात्र प्रभावी अंमलबजावणी कधीच झाली नाही, परिणामी आज मृत माशांचा खच पाहायला मिळतोय. त्यामुळं आळंदीकर पुन्हा आक्रमक होण्याच्या तयारीत आहेत.