मुंबई: अंधेरी पश्चिममध्ये काँग्रेसला ऐन निवडणुकीच्या रणधुमाळीत मोठा धक्का बसला आहे. काँग्रेसचे माजी आमदार अशोक जाधव यांचा मुलगा कुणाल जाधव यांनी ठाकरे गटाच्या शिवसेनेत प्रवेश केला आहे. प्रभाग क्रमांक ६७ मधून उमेदवारी न मिळाल्याने काँग्रेस नेतृत्वावर नाराज असलेले कुणाल जाधव यांनी अखेर पक्षांतराचा निर्णय घेतला.

शिवसेना ठाकरे गटाचे नेते अनिल परब यांच्या मध्यस्थीने मातोश्रीवर पक्षप्रमुख उद्धव ठाकरे यांच्या हस्ते कुणाल जाधव यांनी शिवबंधन बांधत ठाकरेसेनेत अधिकृत प्रवेश केला.

या प्रवेशामुळे अंधेरी पश्चिममधील काँग्रेसच्या गोटात अस्वस्थता पसरली असून महापालिका निवडणुकीच्या पार्श्वभूमीवर हा काँग्रेससाठी मोठा धक्का मानला जात आहे.