संभाजीनगर जिल्ह्यातील सिल्लोड तालुक्यात रात्री मुसळधार पावसाने हाहाकार माजवला आहे. घाटनांद्रा परिसरात ढगफुटी सदृश्य पावसाची नोंद झाली असून गावाचा संपर्क परिसरातील इतर गावांशी तुटला आहे. मुसळधार पावसामुळे सखल भागातील घरांमध्ये आणि वस्त्यांमध्ये पाणी शिरल्याने नागरिकांचे मोठ्या प्रमाणावर नुकसान झाले आहे. चारनेर पुलावरून प्रचंड पाणी वाहत असल्याने वाहतूक पूर्णपणे ठप्प झाली आहे. त्यामुळे वाहनचालक आणि प्रवाशांची मोठ्या प्रमाणात गैरसोय होत आहे. आज सकाळपासून पुन्हा पावसाचा जोर कायम राहिल्याने दैनंदिन जीवन विस्कळीत झाले आहे. मुसळधार पावसामुळे प्रशासनाने नागरिकांना सतर्क राहण्याचे आवाहन केले आहे.