नायगावच्या चिंचोटी धबधब्यात दोन तरुणांचा बुडून मृत्यू झाल्याची दुर्दैवी घटना घडली आहे. प्रल्हाद सहजरवा आणि सुशील डबाळे अशी मृत तरुणांची नावं असून, हे दोघंही मुंबईतील गोरेगावमधील महाविद्यालयाचे विद्यार्थी होते. पावसाळी वातावरणाचा आनंद घेण्यासाठी त्यांच्या मित्रांसह ते चिंचोटी धबध्यावर गेले होते. मात्र धबध्याच्या जोरदार प्रवाहात ते दोघं पाण्यात वाहून गेले आणि बुडून मृत्युमुखी पडले.

या घटनेची माहिती मिळताच पालिकेच्या अग्निशमन विभागाने घटनास्थळी धाव घेतली आणि शोधमोहीम सुरू केली. तब्बल पाच तासांच्या अथक प्रयत्नांनंतर दोन्ही तरुणांचे मृतदेह शोधण्यात यश आले. या दुर्दैवी घटनेमुळे परिसरात हळहळ व्यक्त केली जात असून, प्रशासनाने अशा धबध्यांवर पावसाळ्यात विशेष काळजी घेण्याचे आवाहन केलं आहे.