लातूरमधील घटनेनंतर छावा संघटनेचे कार्यकर्ते आक्रमक झाले असून, आज धाराशिवमध्ये राष्ट्रवादी काँग्रेसच्या कार्यालयासमोर त्यांनी जोरदार आंदोलन केले आहे. या आंदोलनात कार्यकर्त्यांनी बॅनर फाडले, पत्ते फेकले आणि कार्यालयावर दगडफेक करत परिसरात तणावपूर्ण वातावरण निर्माण केले.

संघर्ष अधिकच चिघळल्याचं चित्र असून, राष्ट्रवादी काँग्रेस व छावा संघटनेत तणाव शिगेला पोहोचला आहे. आंदोलन अचानक पेटल्यामुळे परिसरात काही काळ गोंधळाची परिस्थिती निर्माण झाली होती.घटनेची माहिती मिळताच पोलिसांनी तातडीने घटनास्थळी धाव घेतली आणि आंदोलकांना ताब्यात घेतले आहे. सध्या परिसरात मोठा पोलीस बंदोबस्त तैनात करण्यात आला असून, कोणताही अनुचित प्रकार घडू नये यासाठी सुरक्षा व्यवस्था कडक करण्यात आली आहे.