छत्रपती संभाजीनगरमधील रेल्वे रुळाखाली असलेल्या शिवाजीनगर भुयारी मार्गावर एक भीषण अपघाताची घटना घडली. दुचाकीस्वार खाली घसरून पडले. त्यांना गंभीर दुखापत झाली. उपचारादरम्यान, दुचाकीस्वाराचा मृत्यू झाला आहे. अंकुश भाऊराव शंकपाळ (वय वर्ष ६४, रा. चिकलठाणा) असे मृत व्यक्तीचे नाव आहे.

मिळालेल्या माहितीनुसार, शुक्रवारी दुपारी शंकपाळ हे इलेक्ट्रिक स्कूटी सर्व्हिसिंगसाठी बीड बायपास येथे घेऊन जात होते. शिवाजीनगर भुयारी मार्गातून जाताना त्यांची दुचाकी घसरली. डोक्याला जोराचा मार बसल्याने ते गंभीर जखमी झाले. अपघातानंतर स्थानिकांनी तातडीने मदत करून त्यांना खासगी रुग्णालयात हलवले. मात्र, उपचारांना त्यांच्याकडून प्रतिसाद न मिळाल्याने त्यांचा मृत्यू झाला. अंकुश शंकपाळ यांच्या नातेवाइकांनी शिवाजीनगर भुयारी मार्ग बांधणाऱ्या अभियंता, ठेकेदारावर कारवाई करण्याची मागणी केली आहे. या घटनेबाबत पुंडलिकनगर पोलिस ठाण्यात तक्रार नोंद करण्यात आली आहे. संकपाळ यांना दोन मुले असून ते शेती करत होते.