माजी मंत्री छगन भुजबळ आज परभणी जिल्ह्याच्या दौऱ्यावर होते. यावेळी त्यांनी सोमनाथ सूर्यवंशी यांच्या कुटुंबीयांची भेट घेऊन त्यांचे सांत्वन केले.

परभणी येथे काही दिवसांपूर्वी झालेल्या हिंसाचारानंतर पोलिसांनी काही जणांना ताब्यात घेतले होते, ज्यामध्ये सोमनाथ सूर्यवंशी यांचाही समावेश होता. परभणी रेल्वे स्थानकाबाहेर भारतीय राज्यघटनेच्या प्रतिकृतीची कथित विटंबना करण्यात आल्याच्या घटनेनंतर शहरात हिंसाचार उसळला होता. या प्रकरणात पोलिसांनी काही व्यक्तींना ताब्यात घेऊन परभणी जिल्हा कारागृहात ठेवले होते. याच कारागृहात 35 वर्षीय सोमनाथ सूर्यवंशी यांचा मृत्यू झाला.

मात्र, सोमनाथ सूर्यवंशी यांचा मृत्यू नैसर्गिक कारणांमुळे न होता पोलिसांच्या मारहाणीमुळे झाल्याचा आरोप त्यांच्या कुटुंबीयांनी केला आहे. या घटनेनंतर विविध राजकीय पक्षांचे नेते त्यांच्या कुटुंबीयांची भेट घेत आहेत.

या पार्श्वभूमीवर आज छगन भुजबळ यांनी सूर्यवंशी कुटुंबीयांची भेट घेऊन त्यांचे सांत्वन केले. तसेच, कुटुंबीयांकडून संपूर्ण प्रकरणाची माहिती घेतली. यावेळी भुजबळ यांनी स्पष्ट केले की, कायदा सर्वांसाठी समान आहे आणि पोलिसांच्या मारहाणीमुळे जर सूर्यवंशी यांचा मृत्यू झाला असेल, तर संबंधितांवर कारवाई झाली पाहिजे. ते लवकरच मुख्यमंत्र्यांची भेट घेऊन ही संपूर्ण परिस्थिती त्यांच्या समोर मांडणार असल्याचेही त्यांनी सांगितले.