विश्वभूषण लिमये, सोलापूर | साम टीव्ही

महाराष्ट्रात नाशिक, छत्रपती संभाजीनगरसह अनेक ठिकाणी भाजपमध्ये नाराजीनाट्य उफाळून आलं असताना, सोलापुरातही एबी फॉर्मवरून प्रचंड गोंधळ झाला. उमेदवारी अर्ज दाखल करण्याची मुदत संपत आली असताना भाजपचे एबी फॉर्म आले नव्हते. शेवटच्या क्षणापर्यंत इच्छुकांना एबी फॉर्म मिळाले नव्हते.

नेमकं काय घडलं?

सोलापुरात अखेरच्या क्षणापर्यंत भाजपचे एबी फॉर्म वेळेत कार्यालयात पोहचले नव्हते. अगदी शेवटच्या क्षणी भाजप शहराध्यक्ष आणि आमदार सचिन कल्याणशेट्टी हे एबी फॉर्म घेऊन कार्यालयात दाखल झाले होते. शिवसेना शिंदे गट आणि काँग्रेस कार्यकर्त्यांनी भाजप पदाधिकाऱ्यांची वाट अडवली. कार्यकर्त्यांकडून कार्यालयाबाहेर जोरदार घोषणाबाजी करण्यात आली. सत्ताधाऱ्यांकडून गैरवापर सुरू आहे. दबाव टाकला जात आहे, असा आरोपही त्यांनी केला.