आज मंत्री चंद्रकांत पाटील आणि केंद्रीय राज्यमंत्री मुरलीधर मोहोळ यांनी पुणे पोलिस आयुक्तालयात बैठक घेतली. पुणे शहरातील वाढती गुन्हेगारी यावर चंद्रकांत पाटील यांनी बैठक घेत गुन्हेगारांवर कडक कारवाई करण्याचे निर्देश दिले. यानंतर चंद्रकांत पाटील प्रसारमाध्यमांशी संवाद साधत म्हणाले, गेल्या काही दिवसांपासून घडणाऱ्या घटना यातून पुण्यात एक वेगळं चित्र निर्माण करण्याचा प्रयत्न केला गेला. कुठल्या ही गुन्हेगारांशी आमचा संबंध नाही. दिवसाला २ ते ३ हजार लोकांना भेटत असताना अनेक वेळा असे लोकं असतात. जे फोटो काढतात, पण त्यांचा आणि आमचा काही संबंध नसतो. पोलिसांना आश्वासित केलं आहे की, आमचे नाव घेऊन जरी आला किंवा आमचा जरी फोन आला तरी सोडू नका. तसेच गुन्हेगारांचा डेटा जमा करायला आम्ही पोलिसांना सांगितलं, त्यातून बेनामी प्रॉपर्टी शोधा आणि ईडीसाठी प्रयत्न करा. आम्ही दिल्लीत प्रयत्न करू आणि सगळ्यांच्या मागे ईडी लावू. असा कडक इशारा मंत्री चंद्रकांत पाटील यांनी दिला.