जम्मू-काश्मीरमधील लोकप्रिय पर्यटनस्थळ पहलगाममध्ये दुपारी अतिरेक्यांनी अचानक हल्ला केला. त्यामध्ये २८ हून अधिक पर्यटकांचा दुर्दैवी मृत्यू झाला आणि काही जखमी झाले आहेत. प्रत्यक्षदर्शींनुसार, धर्म विचारून गोळ्या झाडण्यात आल्या. हल्ल्यानंतर भीतीचे वातावरण निर्माण झाले असून, स्थानिकांनी धावपळ करत मदतीसाठी पुढाकार घेतल्याचे काही व्हिडिओ सोशल मीडियावर व्हायरल होत आहेत.

पहलगाम दहशतवादी हल्ल्याच्या पार्श्वभूमीवर स्थानिक नागरिकांनी कँडल मार्च काढत हल्ल्याचा तीव्र निषेध नोंदवला. हा भ्याड हल्ला करणाऱ्या अतिरेक्यांचा आम्ही जोरदार निषेध करतो. आमची ओळख आधी हिंदुस्तानीची आहे, त्यानंतर काश्मीरीची, अशा भावना नागरिकांनी व्यक्त केल्या. या शांततेच्या आंदोलनातून स्थानिकांनी एकता आणि देशप्रेमाचा संदेश देत पीडितांना श्रद्धांजली अर्पण केली.

मीडिया रिपोर्ट्सनुसार, अतिरेक्यांनी पहलगाममध्ये सुट्टीसाठी आलेल्या पर्यटकांची आधी नावे विचारली आणि नंतर थेट गोळीबार करत फरार झाले. लष्कर-ए-तैयबा या दहशतवादी संघटनेने हल्ल्याची जबाबदारी स्वीकारली आहे. या अमानुष घटनेमुळे संपूर्ण देशात संतापाची लाट उसळली असून सुरक्षा यंत्रणा अलर्ट मोडवर आहेत.