ठाकरे गटातून भाजपमध्ये गेलेल्या सुधाकर बडगुजर यांनी नाशिकमध्ये मोठी राजकीय बाजी मारली आहे. विद्यमान आमदार सीमा हिरे यांच्या समर्थकांना डावलून बडगुजर यांच्या एकाच घरात तीन उमेदवाऱ्या देण्यात आल्या आहेत. सुधाकर बडगुजर, मुलगा दीपक आणि पत्नी हर्षा बडगुजर यांना भाजपने संधी दिली. हर्षा बडगुजर यांचा अर्ज अगोदर दाखल झाल्याने आमदार समर्थकांचा एबी फॉर्म तांत्रिकदृष्ट्या व्यर्थ ठरला, यामुळे हिरे समर्थक आक्रमक झाले आहेत.

हर्षा बडगुजर यांच्या जागेवर आमदार सीमा हिरे यांच्या समर्थक भाग्यश्री ढोमसे यांना देखील एबी फॉर्म देण्यात आला होता. मात्र हर्षा बडगुजर यांचा अर्ज आधी आल्याने तो ग्राह्य धरला गेला. यामुळे ढोमसे यांचा अर्ज बाद केला गेला. यानंतर आमदार हिरे या शहरातील भाजप कार्यलयात दाखल झाल्या आहेत. यावेळी त्यांच्यासोबत मोठ्या प्रमाणात समर्थक देखील असल्याने पोलिसांचा मोठा फौजफाटा देखील तैनात करण्यात आला आहे.